0
0
Kryeministri Edi Rama sulmon Top Channel dhe e konsideron të turpshëm e të pavërtetë një lajm të publikuar nga media më e madhe kombëtare në vend, se hakerat që kanë goditur sistemet online të qeverisë kanë vendosur një gjobë 30 milionë euro në këmbim të zhbllokimit të tyre.
“Eshtë e turpshme që të gënjehet publiku në këtë farë feje, cilatdo qofshin motivet e kësaj vale shpifjesh haluçinante”, shkruan ndër të tjera Rama në Twitter, duke shtuar “… i bëj thirrje publike TCH të ndalë menjëherë valën e shpifjeve dhe përhapjen e panikut lidhur me pasojat e agresionit kibernetik mbi Shqipërinë!”
Sipas kryeministrit Rama, Qeveria ka informuar aq sa mund të informojë dhe pas sulmit qëndron një shtet tjetër e jo një bandë dosido digjitale që merret me gjoba.
“Gjyqet me median për shpifje, përfshirë edhe shpifjet që përhapin panik, nuk janë në praktikën e qeverisë sonë! Prandaj i bëj thirrje publike TCH të ndalë menjëherë valën e shpifjeve dhe përhapjen e panikut lidhur me pasojat e agresionit kibernetik mbi Shqipërinë!
Lajmet për një gjobë 30 milionë euro nga hakerat apo për shkatërrimin e të dhënave janë krejt të rreme! Qeveria ka informuar aq sa mund të informojë, në ndërkohë që lufta nuk ka mbaruar dhe pas hakerave qëndron një shtet tjetër, jo një bandë dosido digjitale që merret me gjoba!
AKSHI dhe një skuadër e superspecializuar ekspertësh të huaj,po luftojnë natë e ditë për rimëkëmbjen e plotë në kohë rekord të sistemeve pas zmbrapsjes së sulmit.Eshtë e turpshme që të gënjehet publiku në këtë farë feje,cilatdo qofshin motivet e kësaj vale shpifjesh haluçinante”, shkruan kryeministri Edi Rama.
Më poshtë, është dhe lajmi që ka publikuar televizioni Top Channel në edicionin e pasdites së këtij 20 korriku. Referuar lajmit bëhet me dije se hakerat mund të jenë nga Irani dhe kanë kërkuar nga shteti shqiptar 30 milionë dollarë në kriptovalutë.
“Mesazhi mbyllet edhe me nje koment që ngre shumë dyshime. Në të thuhet: Pse duhet të shpenzohen taksat tona në dobi të terroristëve të Durrësit”. Në këtë mënyrë hakerat kanë dashur të tregojnë lidhjen e tyre me shtetin iranian që prej kohësh ka futur Shqipërinë në listën e vendeve jo mike për shkak se strehon anëtarët e opozitës iraniane”, thuhet në lajm.
Admin