0
0
Nëse jeni aventurierë dhe sfidues i “natyrës”, nëse kërkoni të prekni nga afër historinë, vlerat, ajrin e pastër atëherë mos ngurroni të vizitoni Dibrën. Atraksionet kryesore që gjenden në zonën e Dibrës janë ujërat termale, duke e kthyer këtë zonë në një zone shumë atraktive, dhe me rritje të numrit të turistëve.
Përveç llixhave Dibra ka edhe shumë zona të tjera, si kisha, xhamia, kalaja e Grezhdanit, kalaja e Dodës, Lura. Këto atraksione gërshëtohen mjaft bukur me natyrën e bukur, me ajrin e pastër dhe kuzhinën tradicionale dibrane, të cilën turistët vendas apo të huaj mund ta shijojnë në bujtinat e shumta apo hotelet në këtë zonë malore.
Ndërthurja e terrenit me elementët historikë, socialë e kulturorë e bën tërheqëse Dibrën. Të huaj që vijnë për ta njohur nga afër këtë qytet, janë më së shumti turistë Hollandezë, gjermanë e francezë. Gjermanët e Francezet, në pjesën më të madhe vijnë nga Kosova- Kukësi në drejtim të Tiranës dhe nga Maqedonia (Ohri- Dibra e Madhe)- Dibra në drejtim të Kukësit e pastaj në Theth ose Kosovë.
Grehans Uka, guidër turistik lokal në Dibër, tregon për Atsh-në se cilat janë vendet që preferojnë më shumë të vizitojnë turistët.
“Turistët që kam shoqëruar kanë pasur pothuajse të njëjtat zgjedhje në intinerare apo në preferenca e tyre. Një ndër zonat më të vizituara është kompleksi i llixhave duke vijuar drejt fshatrave Bellov, Rabdisht, Cerjan dhe Zagrad e në fund qytezën historike të Bellovës. Po kështu, interes të madh turistët kanë shprehur për intineraret Peshkopi- Bjeshka Cerjanit- Mali Gramës drejt Liqenit të Gramës, Peshkopi- Radomirë drejt Majës së Korabit ose me një devijim drejt liqenit të Gramës. Këto intinerare janë bërë më shumë nga të rinjtë, sidomos gjermanët dhe hollandezët, që janë të apasionuar për lëvizjet në terrene të tilla” .
Sipas, Ukës, kohët e fundit është vënë re dhe një interesim i madh për Rafting në lumin Drin të Zi, që është një variant i ri turizmit në Dibër por edhe me prespektivë sipas tij.
Aktualisht përshkruhen këto itinerare : Peshkopi- Bellova- Rabdisht- Bjeshka e Rabdishtit- Bjeshka e Cerjanit- Dhe mund të vazhdohet drejt Gramës ose kthimi në Cerjan dhe drejt Peshkopisë. Peshkopi- Melan- Ilnice- Bjeshka e Ilnicës- Mali Velivarit . Peshkopi- Radomirë- Fusha e Korabit- Maja e Korabit. Peshkopi- Arras- Lurë. Peshkopi- Maqellar- Pocest- Ujvara e Pocestit- Bjeshka e Pocestit. Peshkopi- Grezhdan (Kalaja e Grazhdanit). Peshkopi- Bugjunec- Liqeni I Bugjunecit. Peshkopi- Arras- Sinë( Muzeu Historik i Kastriotëve). Peshkopi- Maqellar- Kërcisht (Kishat e Kërcishtit.)
Sekreti i Dibrës është që aty turizmi mund të zhvillohet në çdo kohë, pra mund te shtrihet gjatë tërë vitit, duke shtuar variante të tilla si hipizmi apo skitë në dimër. Turizmi malor në Dibër mbështetet nga Ambasada Gjermane e cila përmes organizatës gjermane GIZ ka zhvilluar mjaft trajnime për persona të ndryshëm, për të operuar si guidër turistikë, duke zhvilluar këtë lloj turizmi, ç’ka nxit edhe ekonominë e fshatrave./ata
Admin