0
0
Një helmim masiv i qytetarëve ka ndodhur sërish në zonën e Dibrës. Sipas informacioneve të siguruara nga Euronews Albania, disa persona, mes të cilëve dhe fëmijë, janë paraqitur me simptoma të njëjta helmimi në spitalin e Peshkopisë.
Analizat fiziko-kimike të ujit janë kryer, por rezultatet nuk kanë dhënë ndonjë informacion të qartë për shkakun e helmimit.
Ndërkohë qendrat shëndetësore në dibër dhe strukturat e bashkisë kanë informuar qytetarët dhe kanë sugjeruar që uji të përdoret me kujdes deri në raportimin përfundimtar nga strukturat përkatëse.
Informojmë për situatën në territorin e qarkut Dibër, datë 08.10.2024.
Nga informacionet e marra nga Drejtoria Rajonale Spitalore Dibër dhe nga Njësia Vendore e Kujdesit Shëndetësor Dibër, që ditën e djeshme, në urgjencën e spitalit janë paraqitur raste të shtuara me simptoma gastro-enterite, ku kanë marrë shërbimin spitalor dhe janë kthyer në banesa.
Me marrjen e këtij njoftimi, Prefekti ka marrë kontakt me strukturat e spitalit, NJVKSH, Drejtorinë Rajonale të Ujësjellësit dhe Bashkinë Dibër. Në përgjithësi, pacientët kanë marrë serume ditore dhe janë kthyer në banesë. Në 6 raste (5 fëmijë dhe 1 i rritur) janë shtruar në spitale. NJVKSH gjatë ditës së djeshme dhe ditës së sotme ka marrë analizat fiziko-kimike në të gjithë depot e fshatrave dhe parametrat kanë dalë në normalitet. Analizat bakteriologjike janë dërguar në ISHP dhe pritet që brenda 24 orësh të kemi përgjigjet.
Ndërkohë, mjekët e familjes dhe strukturat e bashkisë kanë informuar qytetarët për përdorimin e ujit me kujdes deri në raportin përfundimtar nga strukturat përkatëse. Situata ditën e sotme paraqitet më e qetë, ku rastet e paraqitura në urgjencë janë të pakta.
Euronews Albania
Admin