0
0
BULQIZË – “Më pëlqejnë sfidat dhe unë jam njeri i sfidave.” Me këto fjalë e ka nisur kryebashkiaku i Bulqizës Lefter Alla diskutimin e tij në dëgjesën publike që zhvilloi me banorë të qytetit, në prag të hartimit të projekt-buxhetit për vitin 2022.
Dëgjesa nisi me prezantimin e disa videove, ku u shfaqën investimet kryesore që ka realizuar Bashkia Bulqizë gjatë këtyre dy viteve, nën drejtimin e Allës. Gjatë fjalës së tij, Alla vuri theksin në synimet e tij për ta shndërruar Bulqizën nga një qytet i lënë pas dore nga pushteti vendor, në një qytet modern, që u përgjigjet kërkesa të qytetarëve për një jetë sa më bashkëkohore.
Ai vuri theksin në disa projekte të cilat Bashkia Bulqizë po implementon, duke kujtuar që këto investime duhet të ishin planifikuar që në fillimin e ndërtimit të qytetit. “Rrjeti i ujësjellësit dhe kanalizimet e ujërave të zeza duhet të ishin menduar që në krye të herës, kur u hodhën themelet e qytetit. Teksa sot ne duhet të angazhoheshim në përmirësimin e shërbimeve të tjera, fatkeqësisht jemi të detyruar të përmbyllim disa prej këtyre nevojave elementare, por të domosdoshme për qytetarët tanë”, tha Alla gjatë fjalës së tij.
Sipas kryebashkiakut Alla, me përfundimin e kanalizimeve të ujërave të zeza, qyteti i vjetër do të marrë një formë krejt tjetër, pasi e gjithë infrastruktura rrugore do të ri-asfaltohet nga fillimi.
Nga ana tjetër, ai vuri theksin në dy projekte të rëndësishme, të cilat i vlerësoi si sfida të tij në drejtimin e bashkisë. “Më pëlqejnë sfidat dhe unë jam njeri i sfidave. Periudha në vijim do të më gjejë të angazhuar në dy sfida që do të ndryshojnë rrënjësisht jo vetëm pamjen e Bulqizës, por edhe jetën e banorëve tanë. E para është rikonstruksioni total i fasadave të të gjithë pallateve në të dyja lagjet e qytetit, ndërsa e dyta, kthimi në park i hapësirës midis dy lagjeve të qytetit, e cila aktualisht është kthyer në një lloj kënete.”, vijoi më tej kryebashkiaku Alla.
Të tjera projekte që Alla solli në vëmendje ishin rikonstruksioni i ish-kompleksit të punëtorëve në lagjen Gjeologu, investimet në sport me një fokus kryesor tek fusha e futbollit, një kompleks sportiv me fusha volejbolli, basketbolli, handball-i, një kënd lojërash për fëmijë, etj.
Bulqiza.info
Admin